Зерттеуші Алма Қыраубаеваның бұл еңбегі XIII-XIV ғасырлардағы түркітілді әдебиет, оның қазақ әдебиетіне әсер-ықпалы туралы. Автор бұл кезеңдегі әдебиетті Алтын орда дәуірі тудырған, Сыр бойында, Хорезмде, Каспий маңы мен Мысырда тіршілік кешкен түркітілдес халықтардың ортақ мәдени ескерткіші деп санайды. «Құпия шежіреден», басқа да еңбектерден мысал келтіреді, қазақ тіліне аударылған шығыс әдебиетінің үлгілерін тілге тиек етеді. Әңгімені Шыңғыс ханның жорығы мен оның ұрпағының тарихынан бастап, Дешті Қыпшақ даласындағы тұрмыс-тіршілікті суреттейді. Одан кейін осы кезеңдегі әдебиет пен мәдениеттің даму барысын сипаттайды. Әл-Фараби, Сағди, Фирдоуси, Низами, Ахмет Ясауи сынды ғұламалардан жалғасқан мұраның дүниежүзі мәдениетімен де үндес екенін айтады. Шығыс ойшылдарының әрқайсына жеке тоқталады. Кітаптың екінші тарауы аударма әдебиетке арналған. Рабғузи қиссалары туралы толық мәлімет беріп, аудармадан үзінділер келтіреді. Кітап қазақ әдебиетін зерттеушілерге мол мағлұмат беріп қана қоймай, зерттеу бағытына жол көрсетеді.