Жиырмасыншы ғасырдағы ұжымдастыру науқаны елді жаппай аштыққа ұшыратып, ел басына зауал тудырды. Қолдан ұйымдастырылған зымиян саясатқа қарсылық білдірген Ғабит Мүсірепов, Мансұр Ғатаулин, Емберген Алтынбеков, Мұташ Дәулетқалиев, Қадыр Қуанышев сынды қазақ зиялылары Сталинге арнап хат та жазады. Сұрапыл кездің шындығын көрсеткен наразылық хаты сол кезде ел басқарған Голощекиннің қолына түскен. Шерхан Мұртазаның «Бесеудің хаты» тарихи драмасы тарихта құжат ретінде қалған осы хаттың негізінде жазылған. Пьесада бюро жиналысы бейнеленеді. Шығармада ел басына түскен зауал Ғабиттің сөзімен беріліп, оның ұлт мүддесін қасқая қорғап, басын өлімге тіккен ерлігі айтылады. «Бесеудің хаты» – жас ұрпаққа тарихымызды білдірер, халық қасіретін ұқтырар туынды.