Сәуле Жанпейісова. Сәуле-сарын Кітап
Сәуле Жанпейісова. Сәуле-сарын

Сәуле Жанпейісова. Сәуле-сарын

Сәуле Жанпейісова. Сәуле-сарын

Қазақстанның еңбек сіңірген қайраткері, Дарын Мемлекеттік жастар сыйлығының лауреаты, филология ғылымдарының кандидаты – Сәуле Жанпейісова. Қазақ сахнасының сәулесі заманымыздың көрнекті әншісі, ҚР еңбек сіңірген қайраткері Сәуле Жанпейісова отыз жылға жуық уақыт дәстүрлі орындаушылық өнерді елімізде және жақын, алыс шетелдерде насихаттап келеді. Ол тоқсаныншы жылдардың өзінде-ақ халқымыздың біртуар ұлы тұлғаларынан «қазақ сахнасының төрінде тұруға лайық жұлдыз, шеберліктің ең шырқау шыңына шыққан әнші» деген баға алды. С. Жанпейісова дауыс мүмкіндігі мол, әсем тембрлі, кең диапазонды, жоғары дауыс техникасына ие шынайы дарынды әнші. Репертуарында мыңға жуық халықтық және авторлық ән-термелер, жыр-толғаулар, бүгінгі заман композиторлар туындылары, қырғыз, тәжік әндері бар әнші оларды асқан көркемдікпен, кәсіби биік деңгейде орындап, халқының сүйікті өнерпазына айналды. Соңғы жылдары музыканттың үздіксіз дамып, толысу үстіндегі репетуарына өз жанынан дәстүр ізімен шығарған жиырмадан астам әндері өзіндік жаңашыл қолтаңбасымен қосылып отыр. Сәуле Стаханшылқызы Жамбыл облысы Сарысу ауданының Жайылма ауылында 1966 жылы дүниеге келді. Ол 1983–1985 жылдары Республикалық эстрада-цирк студиясында Қазақстанның халық артисі Ғ. Құрманғалиевтің класында оқиды. Республикалық «Жігер» фестивалінің (1985), Ә. Қашаубаев, М. Мералыұлы атындағы конкурстардың лауреаты (1988, 1991) және «Дарын» мемлекеттік жастар сыйлығының иегері (1992). 1992–1997 жылдары Құрманғазы атындағы Алматы мемлекеттік консерваториясында күйші-ұстаз Қ. Мұхитовтың класынан бітірді. 1988–1994 жылдары әл-Фараби атындағы Қазақ ұлттық университетінің филология факультетінде оқиды. Ұзақ жылдардың ізденісі нәтижесінде 2010 жылы «Қазақ прозасындағы әнші-ақындар бейнесі» тақырыбында кандидаттық ғылыми диссертациясын қорғады. Көптеген ғылыми-танымдық мақалалардың және «Әуен-сыр» атты кітаптың авторы. 2004 жылы «Ән-абыз» атты өзінің ұстазымен болған соңғы кездесуінен спектакльдің сценарийін дайындап, көрерменге режиссер Б. Атабаев сахналауымен ұсынды. Жаңа бағытта жасалған осы сахналық қойылымда Сәуле басты рөлде ойнап, көпшіліктің жоғары бағасына ие болды. Сегіз қырлы өнерлі жан 2006 жылы ұлттық телеарнада авторлық «Бұл әнді білесіз бе?» тележобасында жүргізуші ретінде жаңа қырымен танылды. С. Жанпейісова 2000–2004 жылдар аралығында Атырау қаласындағы Д. Нұрпейісова атындағы халықтық музыка академиясында басшылық қызметте болса, бүгінде Жамбыл облыстық филармониясының директоры қызметін атқарады. Ол өз өнерінің сәулесімен қазақ сахнасының төрін әлі талай жылдар жарқыратары сөзсіз. Өнертану ғылымдарының кандидаты Бақыт Тұрмағамбетова