Стивен Фредерик Старрдың бұл еңбегі «Ұмытылған ұлылық: Орталық Азияның араб шапқыншылығынан Әмір Темірге дейінгі алтын ғасыры» деп аталатын танымал кітабының жалғасы. Ибн Сина мен Бирунидің медицина, астрономия, математика, философия, география мен физика сынды ғылым салаларының дамуына қосқан өлшеусіз зор үлесі мен өмір жолы баяндалған.

Америкалық тарихшы, Орталық Азияға маманданған білікті сарапшы Ф.Старр екі генийдің өмір сүрген дәуірі мен ортасын жан-жақты сипаттаған. Аласапыран заманға қарамастан, Орталық Азия аймағында өмір сүрген қос ғұлама (бұл қатарға осы даланың басқа да ғұлама-перзенттерін қосыңыз) Қайта өрлеу дәуірінде Еуропа ойшылдары ашты деп саналып келген үлкен жаңалықтың бір бөлігін бес ғасыр бұрын айтқан. Ф.Старр сол жаңалықтарды сипаттап, кейбіріне тоқталып, Шығыстың қос ғұламасының зерттеулеріне әділ бағасын беруге тырысқан. Кітап жоғары оқу орындарының студенттеріне, ғылымға қызыққан көпшілік оқырманға арналған.