Мұхтар Омарханұлы Әуезов шығармаларының елу томдық академиялық толық жинағының 8-томына 1930-1934 жылдар аралығында жазылған мақалалары мен зерттеулері, очерктері мен әңгімелері, болашақ роман эскизі, аудармалары және түрмеде отыруына байланысты құжаттар мен хаттары еніп отыр. Бұлардың қатарында сол жылдардағы қазақ әдебиетіне, драматургия жайына, Абайдың өміріне, шығармашылығына қатысты мәселелерді сөз еткен «Қазақстан мемлекет театрының жеті жылдығы және алдағы міндеттері», «Театр, музыка кадры», «Жақсы пьеса – сапалы әдебиет белгісі», «Үзінділер», «Абайдың туысы мен өмірі», Оңтүстік Қазақстан облысына шығармашылық мақсатпен барып қайтқаннан кейін жазылған «Жуалы колхозшысы», «Білекке білек» тағы басқа әңгіме-очерктері, болашақ үлкен роман «Тұман айығарданың» жобасы, І.Жансүгіровтен «Степь», Б.Эвальдтан «Құрылыс материалдарының» аудармалары бар. Құжаттар мен хаттар жазушының отызыншы жылдардағы өмірінің ең ауыр, қилы кезеңінен хабардар етеді. Кітап ғылыми жұртшылыққа, қалың оқырман қауымға арналған.