Мұхтар Омарханұлы Әуезов шығармаларының елу томдық академиялық толық басылымының 3-томында жазушының 1921–1929 жылдар аралығындағы мұралары қамтылды. Олар: мақалалар, әңгімелер және 1926 жылы жеке кітап болып басылып шыққан «Қаракөз» пьесасы. «Қаракөз» пьесасы мен «Қаралы сұлу» әңгімесінің екі нұсқасы (вариант) беріліп отыр. Бұл томға ертедегі газет-журналдарда жарық көргеннен қайтып ешқайда басылмаған еңбектері де енгізілді. Жалпы осында қамтылған мұраларынан драматургия, көркем шығармадағы ізденістері мен театртану саласына көніл аударғандығы көрінеді және көркемдік жетістік, өзіндік бағыт, бет алыс жағынан болсын жиырмасыншы жылдардағы әуезовтік бітім танылады. Кітап ғылыми жұртшылыққа, сондай-ақ, көпшілік оқырманға арналған.