Мұхтар Омарханұлы Әуезов шығармаларының елу томдық академиялық толық басылымының 2-томында жазушының 1921–1925 жылдар аралығында жазған мұралары қамтылды. Олар: мақалалар, әнгімелер және 1923 жылы жеке кітап болып басылып шыққан «Бәйбіше – тоқал» пьесасы. Жалпы алғанда мұнда жинақталған еңбектерінің көпшілігі ертедегі газет-журналдарда жарияланғаннан кейін қайтып ешқайда басылмаған. Бұларда қазақ өмірі мен әлеуметтік жай-жағдайларының алуан-алуан қырлары мен сырлары сөз болады: өнер-білім, шаруашылық, мемлекет, ағарту ісі жөніндегі қилы-қилы ой-толғаныстары айтылған. Осылардың барлығы да ұлттық мүдде, ұлттық тұрғыда қарастырылады. Бұл еңбектерден жазушының жиырмасыншы жылдардың басындағы көркемдік ой деңгейі, шығармашылық бет алысы, азаматтық көзқарасының бағыт-бағдары танылады, тұлғалық бітімі күрделеніп, биіктей төседі. Кітап қалың оқырман қауымға, сондай-ақ ғылыми жұртшылыққа арналған.