Бауыржан Момышұлының шығармалары батырлыққа, өрлікке баулиды. Жазушы шығармашылығының ерекшелігі – ойдан шығарылған оқиға мен жасанды кейіпкерлерден аулақ. Көзбен көрген оқиғаларын бойына сіңірген туындылардың әлеуметтік, қоғамдық сипаты басым. Салт-дәстүрін ұлықтап, соның негізінде түйген ойларын ұрпақ санасында жаңғыртуға еңбектенеді. Ұлттық қадір-қасиетімізді ұлықтаудың болашақ үшін қаншалықты маңызды екенін шығармалары арқылы жеткізеді.