«Рух және сезім» – ақын Олжас Сүлейменов жайлы. Ақынның «Жер, адамға табын!» поэмасын Мұқағали сюжетсіз, «қиян-кескі қырқыс пен тағдырлар тартысы жоқ» дүниеге жатқызады. Алайда, ақынның әр сөзінде құпия да терең философия мен зор азаматтық үн жатқанын баса айтады. «Сезім найзағайы» – «қалайда бір жалт беріп, тіліп өтпей тыншымайтын» Қадыр Мырза Әлі туралы мақала. Қадыр ақынның поэзияға кездейсоқ қосылмағанын, үлкен мектептен өтіп, үлкен даярлықпен келгенін мысал келтіре отырып баяндайды. «1969 жылғы қазақ поэзиясы» мақаласында М.Мақатаев әдеби тізім әркімнің еңбегіне қарай жасалғаны жөн деген ой айтады. Арғы-бергіні қоя тұрып, нақ 1969 жылдың бедеріндегі қазақ поэзиясының жаңалығын жария етеді. Әр ақынның ізденісін бағалап, өлеңдерін талдай отырып жазады. Бұдан кейінгі мақала да жыр әлеміне әдеби сын.