Сәбит Мұқанов қазақ әдебиетінің барлық жанрында өнімді еңбек етіп, 80 мың жолға жуық лирикалық өлең, жиырма шақты поэма, бірнеше повесть пен роман, әңгімелер, очерктер, оннан аса пьеса, жоғары оқу орындарына арналған оқулықтар, монографиялар, қазақ мәдениетінің тарихы мен этнографиясы туралы зерттеу еңбектер жазған. Сәбит Мұқановтың алғашқы өлеңдері мен поэмалары, мақалалары мен әңгімелері 1917 жылдан бастап жариялана бастаған. 1924 жылы «Совет өкіметі һәм қазақ әйелі» атты тұңғыш кітапшасын шығарды. Жиырма жасында тұңғыш поэмасын жазған. Проза саласында роман мен мемуарлық әдебиеттің дамуына үлес қосты. Сәбит Мұқанов драматургия мен әдебиеттану саласына да көп еңбек сіңірді. Шығармалары әлемнің 46 тіліне аударылған.