Қазақ әдебиетінде жазба поэзияны қалыптастыруға атсалысқан көрнекті ақын – Нарманбет Орманбетұлы. 1859 жылы қазіргі Қарағанды облысы, Ақтоғай ауданында дүниеге келген. Қазақ қоғамында тарихи-әлеуметтік қайшылықтар шиеленісіп, жаңа даму үрдісі басталған дәуірде өмір сүрді. Ел басқару жұмысына жасынан қызу араласып, мол білім мен тәжірибе жинақтаған. Ақын ретінде де, ойшыл ретінде де ұлы Абайды ұстаз тұтқан. Поэзиясында өз кезінің өмір шындығын шынайы бейнелеп, заманы алға тартқан сұрақтарға жауап беруге талпынды.