«Екейде елу бақсы, сексен ақын» дегендей, Жетісуда Сүйінбайдан, Жамбылдан келе жатқан ақындық дәстүр дүниеге көптеген таланттар берді. Міне осы топтың ішінен ала-бөле көзге түсетіні – Кенен. Ол бір суырып салма ақын да, екіншіден жақсы әнші, ал үшінші жағынан өзі көптеген ән шығарған халық композиторы. Кененнің өмірінде кейінгі жас ұрпаққа үлгі боларлықтай кезеңдер көп. Ол творчествосында адам бақыты үшін күрестің жырын жырлады, бері келе, жеңістің, туысқандықтың, шын мәнісіндегі бақыттың жырын жырлады.

          Жетісу дәстүріндегі ақындықтың жайылуы Кененге жақсы әсер етеді. Бай ауылына келген, қона жатып жыр жырлаған, өлең айтқан әнші, ақындар Кененнің санасында үлкен із қалдырады.

          Кенен осылай жүріп, өз әндерінің санын көбейтеді. Ол сол бір далада жүрген кезінде-ақ жаратылыстың не бір әсем көріністерін өлеңіне қосады.

            Кенен әндерінің ерте уақыттан бері белгілі болуының айғағы А.Затаевичтің жинақтарында Кенен әндерінің жүруі. Ол өзі көрмесе де, Кененнің ақын-әнші екенін кітабының түсінік сөзінде жазып кеткен. Кенен әндерін композитор Л.Хамиди, С.Шабельский 1934 жылы нотаға түсірді. А.Затаевич жазуындағы әнді композитор Е.Брусиловский өзінің «Қыз Жібек» операсында пайдаланды. Кененнің әндерін көп жиған адам Б.Ерзакович. ол Кененнен 150-ден астам ән жазып алса керек.

Ахмет Жұбанов