Уақыттың тежеуіне ерік бермей

            Керекулік ақын Арман Қанидың өлеңдерімен алғаш танысқаныма ширек ғасыр асты білем. Алайда, мен оның өмір соқпағын онша білмейді екем-ау.

            Қани Арманның қалам қайратын жұмсауына 70-жылдардың аяғына дейін жол жабылыпты. Бұл заңсыздықтың зәбірі еді. Ақын кейіннен:

Оспадар қауым осқылап қанды сауырын,

Арқырап зулап келеді тарпаң Дәуірім.

Азамат болсаң, Адамзат үшін жауап бер!

Ар-ұжданыңның алдында сен де,  бауырым! –

деп, өр сөйлеуге хақылы екенін танытты. Рухани мықтылық нышаны, міне осындай.

            Қуантатыны – тұңғыш кітап болса да, құнды кітап қолымызға тигені. Қаламгердің қайсы өлеңін оқысаң да, басты тенденциясы автордың тарихтан терең тағылым теретіндігі. Халықтың қазіргі де, келешектегі де ұл-қыздарының ата-бабалар өткен дәуірлердің ізгі дәстүрінен кіндігі үзілмеуге тиіс. Осы қағиданы Қани Арман өз поэзиясы арқылы бекіте түсуде өз үлесін қосуда екенін дәлелдеген.

            «Адамзат үшін жауап бер!» дейтін лирикалық кейіпкер масштабты ойлайды, қомақты көлемде толғанады. Сонысымен де бізді өзіне тартып, бүйрегімізді бұрғызады. Бұл, міне, қалам қуаттылығы!

            Ақынды ең алдымен аяулы отан – қасиетті Қазақстанның тағдыры толғантады, түн ұйқысын төрт бөлгізеді.

Мұзафар Әлімбай