Ғали Орманов 1907 жылы Алматы облысы Қапал ауданы Қызыл жұлдыз ауылында өмірге келген. Ақын түрлі жылдарда «Социалистік Қазақстан» газетінде әдеби қызметкер, бөлім меңгерушісі, Жамбыл Жабаевтың әдеби хатшысы, «Майдан» альманағының редакторы, «Әдебиет және искусство» журналының жауапты редакторы, Қазақ мемлекеттік көркем әдебиет баспасының бас редакторы, Қазақстан Жазушылар одағының хатшысы, секция меңгерушісі қызметтерін атқарған. Оның тырнақалды «Шеңбер» деп аталатын өлеңдер жинағы 1934 жылы жарық көрді. Ақынның «Шәуілдір», «Алынған қамал» дастандары, «Көтерме», «Абысын сыры» кітаптары басылып шықты. Қырғыз эпосы «Манастың» 1-кітабын, А.С.Пушкиннің, М.Ю.Лермонтовтың, Ян Райнистің, Ф.Мақтымқұлының, А.Тоқомбаевтың бірқатар дастандарын, Л.Н.Толстойдың «Анна Каренина» романын, Н.В. Гогольдің «Нева проспектісі» повесін, А.П.Чеховтың әңгімелерін, М.С.Бубенцовтың «Ақ қайың» романын, М.Тұрсын-Заденің «Үндістан балладалары» өлең кітабын қазақ тіліне аударды. Ғали Ормановтың өз туындылары да шет тілдеріне тәржімаланған.