Әлеуметтік һәм психологиялық талдау тәсілі бір арқанның екі тініндей өрілген  шығарма – Әбдіжәміл Нұрпейісовтің «Қан мен тер» трилогиясы. Бұл туынды –  ел, халық, оның әлеуметтік тағдыры туралы шығарма. Уақыты өзгергенімен, заманалық зәрулігі өзгермейтін туынды. Тірлік-тынысы әлдеқайда кең шығарма және жанрлық жағынан да басқаға ұқсамайды. «Қан мен тер» трилогиясы «Ымырт» (1961), «Сергелдең» (19б4), «Күйреу» (1970) романдарынан тұрады. Атының өзінен-ақ байқалып тұрғандай, төбеден жарқырап тұрған күнді аз кезіктіреміз. Ал мамыражай күн туа қалса, кейіпкерлерді тағы бір азапты күн күтіп тұрады. Бас кейіпкері Еламан тәрізді туынды ұдайы дерлік томырылып, үнсіз-түнсіз тұнжырап түнерген қалпынан жазбайды. Соның өзінде де туған өлкеге деген сүйіспеншілік сезімінің орны бөлек. Прозашының туған халқына, оның жазира даласына деген сүйіспеншілігі елінің кең қолтық мінезін, шалқар әнін, тарихын суреттеуінен аңғарылады.