Кейінгі дәуірлерде қалыптасқан, әлеуметтік мазмұны жағынан әлдеқайда өткір мәселелерді көтеретін Алдар көсе туралы ертегілерде адам бойындағы ашкөздік, сараңдық сияқты қасиеттер, жалпы жағымсыз қылықтар келекеленіп, ақылды, алды-артын болжағыш қасиеттер дәріптеледі. Сондай-ақ бұл топтағы ертегілер қоғамның кеселді дерттерін аяусыз әшкерелейді, халықтың озбырлыққа, тоғышарлық пен зорлықшылдыққа деген теріс көзқарасын танытады. Тілі жеңіл, оқиғасы ықшам ертегілер оқырманын күлдіре отырып ашындырады, сынай отырып, ең басты құндылық – адами қасиетті сақтау екенін нақтылайды.