Балаларға балдай жыр

«Мектеп кітапханасы» сериясымен жарық көрген көрнекті ақын Несіпбек Айтұлының «Балаларға балдай жыр» атты бұл жинағы өскелең ұрпақтың рухани танымын кеңейтуге арналған. Кітаптың бірінші бөліміне мектеп өмірін, оқу-білімді және баланың күнделікті серігіне айналған оқу құралдарын («Оқулық», «Портфель», «Күнделік», «Қалам», «Пенал», «Дәптер» т.б.) арқау еткен қызықты да тағылымды өлеңдер енген. Ал екінші бөлімде ақынның тәрбиелік мәні зор аударма еңбектері жинақталған: ол Бо Цзюи, Ли Бай, Михаил Исаковский, Назым Хикмет, Жүніс Еміре сияқты әлем әдебиеті классиктерінің балаларға арналған туындыларын қазақ тілінде шебер сөйлеткен. Жыр жинағы жас оқырмандарды еңбекқорлыққа, әдептілікке, ана тілін қадірлеуге және ұлттық рухта өсуге тәрбиелейді.