Жұртшылық назарына ұсынылып отырған бұл кітапта құс аңшылығы және саятшылық туралы «Қырандар» атты кітаптағы деректер қайта қаралып, толықтырылып берілген. Қазақ халқының тұрмысына етене кірген он бір қыран, әсіресе бүркіт туралы егжей-тегжейлі мәліметтер келтіріліп, бүркіттің түр-тұлғасы, мінез-сезімі, қырандығы, қырағылығы, ұшу-қону, аңға түсу, қимыл-мәнері туралы айтылған. Қыранды ұстау, үйрету, түлету, баптау, аңға салу туралы бапкерліктің әдіс-айласы жайында ақыл-кеңес беріліп, бүркіт аталған қыранмен аң аулаудың кәсіптік және сауық-сайран, сән-салтанаттық мән-мағынасы туралы сыр шертілген. Сонымен бірге құс аңшылығының халық тұрмысына қажетті шикізаттарды дайындауға да пайдалы жақтары көрсетілген. Кітаптың өн бойында жалпы аңшылыққа, әсіресе құс аңшылығына байланысты көптеген атау сөздерге түсіндірмелер жасалған және ит қосып аң аулау жайында жаңа бөлім қосылып отыр.