Қалампыр Кенжеғалиқызы Қазақ мемлекеттік университетінің журналистика факультетін бітіргеннен кейін кітап баспасы саласында, ресми аудармада қызмет ете жүріп, көркем әдебиеттен де қол үзген жоқ. Ұрпақ тәрбиесі, қазақ халқының дәстүрі мен рухани құндылықтары хақында үнемі ізденіс үстінде жүреді. Республикалық беделді басылымдарда жарық көрген, осы жинаққа топтастырылған әңгімелері мен сұхбаттары бұған куә.

Кітап авторы қазақтың салт-дәстүріне, тұрмысына, қол өнеріне қатысты ел ішіндегі ісмерлердің тәжірибелерін жинақтап, сексенінші жылдардың аяғында баспаға ұсынды. Ол еңбегі – республикалық «Қайнар» баспасынан «Жүннен жасалатын бұйымдар» деген көпшілікке арналған этнографиялық жинақта жарық көрді. Туынды үлкен сұранысқа ие болып, республиканың ауыл мектептерінде қол еңбегі сабағына арналған құнды оқу құралы ретінде танымал.

Автордың екінші кітабы -  «Иесі бар үй» атты прозалық жинағына енгізіліп отырған замандастары жайлы көркем әңгімелері, эссе-естеліктері мен сыр-сұхбаттары да өз оқырмандарын табатынына күмәніміз жоқ.