Жыл өткен сайын балаларды қаржылық сауаттылыққа ерте жастан баулудың маңызы артып келеді. Жедел қарқынмен дамып келе жатқан ғылым мен технология, оның ішінде қаржылық операциялар тәсілдері халқымыздың заман ағымынан қалып қоймауын талап етеді. Бұл орайда балаларға қаржы әліппесін бастауыш сынып партасында-ақ үйрете бастаған абзал. Ол балалардың болашақта өз қаражатын тиімді басқарып, орынды жұмсауына үйретіп қоймай, сондай-ақ, қаржы алаяқтарының құрбаны болу қаупін де азайтады. Олардың есеп шығару қабілетін шыңдап, өз бетінше дұрыс шешім қабылдауына тәрбиелейді. Кітапты әзірлеу барысында Алматы қаласының тұрғындары – Баймырзаевтар отбасы (кітапта кейіпкерлердің аты-жөні өзгертіліп берілген) нысанаға алынып, қаржылық есептер мен ойындар бойынша тәжірибе жасалды. Соның нәтижесінде мектеп оқушыларының жас қабілеті мен таным деңгейіне қарай, есептер сараптан өткізіліп ұсынылды. Қолдарыңызға тиіп отырған кітап қызықты ертегілер, қаржы әліппесінің теориясымен қатар, балалардың өз білімін тексеруіне арналған тәжірибелік тапсырмаларды да қамтиды. Бұл тапсырмаларды осы кітап бетінде-ақ орындауға болады. Көркем иллюстрациялар мен ыңғайлы безендіру балаларды жалықтырмайды. Кейіпкерлермен бірге ойынға қатысып, тапсырмаларды белсенді түрде орындауға жетелейді.«Бай балақай» кітабы мектеп жасындағы балаларға арналған.