Мұхтар Омарханұлы Әуезов шығармаларының елу томдық академиялық толық басылымының 5-томында 1927-1929 жылдарда жазылған «Қилы заман», «Қараш-Қараш оқиғасы» (екі нұсқасы) прозалық шығармалары мен «Хан Кене» (екі нұсқасы және орыс тіліне автордың аудармасы) драмасы  қамтылды: «Қилы заман» 1929 жылы Қызылорда қаласында басылып шықты, «Қараш-Қараш оқиғасы» «Жаңа мектеп» журналының 1927-28 жылдардағы сандарында жарияланғанынан қайтып, 1936 жылға дейін кітап болып басылған жоқ. 1928 жылы жазылып біткен «Хан Кене» 1934 жылы Қазақ драма театрында бір рет қойылғаннан кейін, солақай сынға Ұшырап, Ағарту министрлігінің бұйрығымен тоқтап қалды. Осындай себептерге байланысты пьеса жазушының жиырма томдық шығармалар жинағына дейін (1983, 14-том) баспа бетін көрмеді. Бұл еңбектер жиырмасыншы жылдардың екінші жартысындағы М.Әуезов шығармашылығынан жан-жақты хабардар ете алады. Кітап ғылыми қауымға, қалың оқырман жұртшылыққа арналған.