«Құнды кітаптар» – ұлтымыздың баға жетпес байлығы. Төте жазумен, ескі әліпбимен шыққан кітаптар, жыр-дастандар, қазақ тарихына қатысты құнды дүниелер осы серия аясында топтастырылған. «Қазақстанда мәдениет революциясы», «Қазақтың халық композиторы Құрманғазы», Әдебиет хрестоматиясы, Біржан мен Сараның айтысы бір төбе болса, Затаевич қазақ даласын аралап жүріп жазып алған 500 ән-күйіміз бір төбе. Қазақ хандығы туралы құнды дүниелер, 1916 жылғы ұлт-азаттық көтеріліс туралы жазбалар, Исатай-Махамбет көтерілісі туралы кітаптар – тасқа басылған тарихымыз. Қазақ мектебінде физика мен жаратылыстануды оқыту да жеке кітап болып шыққан. Қисса-дастандар, мысал өлеңдер, қазақ даласын мекендейтін аң-құстар туралы жазбалар, ескі әліпбимен шыққан әдеби кітаптармен қатар, Түркістанның тарихы, Қожа-Ахмет Ясауи туралы танымдық дүниелер – нағыз байлық. Сонымен қатар, түрлі есептер, нұсқаулықтар да берілген.