Ахмет Байтұрсынұлының алты томдық шығармалар жинағының кіріспесі профессор Айгүл Ісімақованың талдау мақаласынан басталады. Әрі қарай «Қырық мысал» және «Маса» жинақтары берілген. Екінші томда ағартушының қазақтың көзін ашу мақсатымен жазған оқулықтары туралы, соның ішінде Телжан Шонанұлымен бірлесе жазған «Оқу құралы» атты әдістемелік құрал жайлы айтылады. «Оқу құралының» ғылыми құндылығы туралы А.Ісімақова баяндайды. Оқулықта Ыбырай Алтынсарин, Абай Құнанбайұлы, Бейімбет Майлин, Міржақып Дулатұлы және тағы да басқа ақын-жазушылардың әңгіме-өлеңдері берілген. Ахмет Байтұрсынұлының ғылыми мұрасы ішінде Тіл біліміне қатысты еңбектерінің орны бөлек екені даусыз. Шығармалар жинағының үшінші томы осы тақырыпқа арналған. «Тіл – құрал» туралы академик Рәбиға Сыздықтың мақаласынан кейін 1914 жылы Орынборда басылған оқулық берілген. Төртінші том Әліппе пен әліпбиге арналса, бесінші томда ХХ ғасыр басындағы қазақ баспасөзінде жарық көрген мақалалары топтастырылған. Ал алтыншы том ұлт ұстазының жинақтарған енбеген еңбектеріне, ресми құжаттарға арналған.