1960 жылы классик жазушы Мұхтар Әуезов АҚШ Мемлекеттік департаментінің шақыруымен Америкаға сапармен барады. Ол Нью-Йорк, Вашингтон, Аризона, Калифорния штаттарын бір ай аралап, көрген-білгенін «Америка әсерлері» деп атаған жолжазба жинағына түсіреді. Әуезов жазбаларының дені Американың сол замандағы әр алуан саладағы жетістіктерін, табиғатының сұлулығын, халқының тұрмысын сипаттаумен қатар, америкалық замандастарымен әңгіме-сұхбаттарынан сыр шертеді. 1961 жылы сапарынан бір жыл өткен соң жазушы қайтыс болып, оның "Америка әсерлері" аяқталмай қалады. Соған қарамастан, «Америка әсерлерінің» тарихи құндылығы зор. Қазақстандағы АҚШ Дипломатиялық миссиясы 2021 жылы Қазақстанда тұратын америкалық гид және оқытушы Деннис Кинмен бірігіп, Әуезовтің Америка сапарының жолжазбаларын ағылшын тіліне аударып, алғаш рет кітап етіп басып шығарды.