Аққошқаров Совет Бірмағамбетұлы 1939 жылы қараша айының 4-і күні Қарсақпай (қазіргі Ұлытау) ауданының Байқоңыр ұжымшарында туған. Совет Аққошқаров жетпісінші жылдары Қазақстан баспасөз беттерінде кеңінен көрініп, көпшілікке танылған журналист болды. Очерктері мен суреттемелері республикалық «Социалистік Қазақстан», сондай-ақ облыстық газеттердің беттерінде үзбей жарияланып тұрды. Өз қаламгерлік шығармашылығында ол «Ақүңгірұлы» лақап атымен белгілі.

Аққошқаров Совет  еңбек жолын 1956 жылы Қарсақпай мыс балқыту зауытында бастады. 1959 жылы комсомолдық жолдамамен Қазақстан Магниткасы атанған Қарағанды металлургия зауытына барып, Егеменді Қазақстанның тұңғыш президенті Н.Ә.Назарбаевпен бірге жастық жалынмен жұмыс істеді. Сонда жүріп әріптестері жайлы озат металлургтердің үлгілі істерін жастарға өнеге боларлықтай етіп, республикалық және облыстық газеттерге үнемі жазып жүрді.

Совет Аққошқаров 1961 жылы С.М.Киров атындағы Қазақ Мемлекеттік университетінің (қазіргі әл-Фараби атындағы ҚазҰУ) журналистика факультетіне түсіп, 1966 жылы бітірді. Оқуды бітірісімен «Лениншіл жас» газеті редакциясының жұмысшы жастар бөліміне әдеби қызметкерлікке алынды. 1968 жылы «Социалистік Қазақстан» газеті редакциясының өнеркәсіп, құрылыс және транспорт бөліміне әдеби қызметкерлікке шақырылып, республиканың алып кәсіпорындарынан очерк, суреттеме, проблемалық мақалалар жиі-жиі жазып жүрді. 1970 жылы «Тың жерлерді игеру жұмыстарына қатысқаны үшін» деген медалімен марапатталды. 1972 жылы шілде айынан КСРО Журналистер Одағының мүшелігіне алынды.

1973 жылы 19 қарашада Жезқазған өңіріне қызметтік іс сапармен барып, 34 жасында шығармашылық жолы мезгілсіз ерте қиылып кеткені өкінішті-ақ. Талантты журналистің көптеген ойлы очерктері мен мазмұнды мақалаларынан басқа, 1973 жылы «Қазақстан» баспасынан шыққан «Жарық жұлдыздар» очерктер жинағында оның «Жер астындағы жұлдыздар» атты очеркі, 1975 жылы «Жазушы» баспасында «Ақ түтекте» атты балаларға арналған әңгімелер жинағы және 1976 жылы «Бақыт құшағында» атты жеке очерктер жинағы жарық көріп, оқушылардан және әдеби сыншылардан жақсы баға алған. 34 жасында дүние салған Советтің артында жұбайы Тұрсынгүл, екі баласы – 4 жастағы Ақботасы мен 1 жастағы Нұрланы қалды. Тұрсынгүл жоғары білімді экономист, күйеуі қайтыс болғаннан кейінгі өмірі сол екі баланы Советтің ойындай бағуға, тәрбиелеуге арнады, аяулы алақанының жылуын екі перзентіне сарп етті. Тынымсыз еңбек етіп, әкесіз қалған екі кішкентай баласын бағып-қағып, тіршіліктің бар ауыртпалығын бір өзі қайыспай көтеріп, екеуіне де жетімдік көрсетпей, оқытты, абыройлы, еңбексүйгіш азамат етті.

Совет пен Тұрсынгүлдің балалары жоғары білімді мамандар. Ақбота – араб тілінің маманы, университетте мұғалім, ал Нұрлан – дипломат, қытай тілінің маманы, Қазақстанның Сыртқы Істер Министрлігінде, Қазақстан Республикасының Қытай Халық Республикасындағы елшілігінде бірнеше жыл абыроймен еңбек етті. Аққошқаров Советтің 7 немересі бар: Ақбота қызында – 4, Нұрлан ұлында – 3.