Қазіргі қазақ мәдениеті – сан салалы арналары бар рухани жетістіктермен сараланып көрінеді. Рухани мәдениет қазыналарының ең негізгі салаларын жекелеген шығармашылық тұлғалардың еңбектері құрайды. Әлем өркениеті тарихында шығармашылық жұмысында өлеңді де, көркем қара сөзді де, драмалық туындыны да, ғылыми зерттеуді де біртұтас ұстап, бәрін де меңгере жазатын қаламгерлік дәстүр бар. Бұл дәстүрді тұтынған қаламгерлік жұмыстың заңдылығы – Құдай берген талантын, дарынын тынымсыз ізденістер арқылы шыңдай түсу, уақыт талаптарына үндесе өнімді еңбек нәтижелерін көрсету.

            Қазақ сөз өнері әлеміне сонау алпысыншы жылдары әуелі журналист, одан кейін ақын, ғалым ретінде қадам басып, үздіксіз жарияланған кітаптары, мақалалары оқырмандарының көңілінен орын алған сондай қаламгер – Өтеген Күмісбаев. Нақтылап айтсақ, оның шығармашылық-қаламгерлік жолы бірнеше арналармен айқындалады: біріншісі – ақындығы, екіншісі – проза жазушылығы, үшіншісі – зерттеуші ғалымдығы, төртіншісі – әлем әдебиетін қазақша сөйлеткен аудармашылығы, бесіншісі – жоғары оқу орнында ұзақ жыл дәріс оқыған ұстаздығы. Бұлардың әрқайсысына тән елеулі түрде әңгімелеуге татырлық ерекшеліктер бар.

            Көрнекті қаламгер, шығыстанушы ғалым-ұстаз Өтеген Күмісбаев  - шығармашылық жұмыстың әрі қиын, әрі мәртебелі биіктеріне көтерілген қалпымен халқына кең танылған Тұлға. Жеті ондыққа толған өмір белестерінде асқақ арманын ізгі мұраттар жолына арнаған ғалым-қаламгер – ұлттық болмысымыздың жарқын көрсеткіші. Бұл – туған халқының тарихымен бірге аталатын мәңгілік өмір жолының ұлағаты.

Темірхан Тебегенов