Мұнайлы өңір жыршысы

Айтуардың шығармаларын зер сала оқыған адам шын мәнінде де оның нәзік сезімді ойшылдығына, сыршылдығына тәнті болады.

Айтуар – мұнайлы өлкенің жыршысы. Ол осы бір ойға ауырлау тақырыпты өлеңмен өрнектей алды. Оны Маңғыстау, Үстірт жерінің таңғажайып тарихы мен табиғи құбылыстары да қызықтыруда. Айтуар журналистік іспен өмірді барлай, байқай жүріп, жүрек тебірентерлік адами мәселелерден ақықтай мөлдіретіп сұлу түйіндер жасайды.

Маңғыстау өлкесінің өткен шежіре – тарихына терең үңіле білгісі келген адам ақынның «Ақсұқсыр», «Қалыңдық», «Ақшолпан», «Құла ат қасіреті», «Тобанияз толғаулары», «Ант», «Алланың сүйген құлы бол», «Суын айғыр, барсың ба!», «Шерқала» т.б көркемдігі жоғары балладаларымен танысса, бұл өлкеге келмей-ақ оның салт-дәстүрін көңіліне түйер еді.

Ол қайта құрудың алғашқы кезінде алғаш рет өз ұлтын өзі тану жөнінде батыл қалам тартып, оқырмандарды елең еткізіп, зор сүйіспеншілікке бөленеді. Сөйтіп, ұмыт қалған тарих қойнауынан сырлар тартуға өзінен кейінгі жас қаламгерлерді жетеледі, тәрбиеледі.

Бектұр Төлеуғалиев