Балалық шақ дегеніңіз – өмірі таусылмайтын ертегі. Және ескірмейтін, ойға алған сайын түрленіп, жаңара, жасара түсетін, сосын сенің жан-дүниеңді де мөлдір шыққа көметін керемет әлем ғой! Мейлі, қанша жерден классик бола беріңіз, бәрібір балалық шаққа бір «аялдама» жасамай жақсы шығарма жазуың мүмкін емес. Керек десеңіз, бұл талай мықтының басынан өткен, дәлелденген шындық.

Біздің балалық шақ ұлы теңіздің жағалаудан қаша бастаған, тартыла бастаған өкінішті кезеңімен тұспа-тұс келді. Ертегі дегеннен шығады-ау, мен қазір сол теңіздің бір кездері үйді жығар түйе өркеш дәу толқындарының болғанын да, жойқын дауыл тұрғанда үлкен кемелерді табалдырық алдына әкеп тастайтынын да балаларым мен немерелеріме сендіріп айта алмаймын. Біртүрлі қиял-ғажайып ертегі айтып тұрған секілдімін. Орыстың тамаша жазушысы К.Паустовскийдың «Теңіз жағалауында туғандардың ақын болмауға қақысы жоқ» деген сөзі бар. Сол айтпақшы, теңіздің адамға берер «сый-құрметін» тек теңіз жағалауында туғандар ғана түсінеді. Оны сөзбен айтып жеткізу де қиын. Теңіздің адуынды толқындарына көз тігіп, балақты тізеге дейін түрініп, құм жағамен біраз жер жаяу жүріңізші. Жан сарайың әп-сәтте тазарады, бойыңды өршіл рух сезімі билейді, ал өзің басқа әлемде жүргендей сезінесің.

Шүкірлік айтайық, «Кіші Арал» менің жағалаулық жерлестерімнің жігерлерін қайта жаныды, болашаққа деген сенімдерін оятты, құлшындырды. Балалық шағымның өлмес күндерімен қайта жолыққандай жағдайдамын. Жыл сайын теңіз жағалауына барып, балақты тізеге дейін түріп тастап, құм жағада армансыз жаяу жүрмесем, денемді біртүрлі бойкүйездік басады да тұрады.

Қуаныш Жиенбай

    Қуаныш ЖИЕНБАЙ — жазушы, Қазақстан ЖО мүшесі (1985). ҚазМУ-дің журналистика факультетін бітірген (1976). Республикалық басылымдарда  қызметтер істеген. Шығармалары: «Жалғыз желкен» (1984), «Теңіздегі бір тамшы» (1986), «Құлан жанарындағы ғұмыр» (1988), «Жизнь в глазах кулана» (1992), «Жер сілкінісінен бір жұма бұрын» (1996), «Даңқ түрмесінің тұтқыны» (2000), «Қателесесің, қымбаттым» (2004), «Елде жоқ ережелер» (2006), «Жиделітоғайдағы жеті күн» (2007). Екі томдық шығармалар жинағы (2008). «Ән салуға әлі ерте» (2008). «Күн түспейтін терезе» (2012)... Республикалық театрларда драмалық шығармалары сахналанған. «Жалын» баспасы жариялаған жабық бәйгенің бірнеше мәрте жүлдегері. Халықаралық «Алаш» әдеби сыйлығының (1998), республикалық «Астана-Бәйтерек» әдеби шығармалар  бәйгесінің бас жүлдегері (2007). ҚР Мәдениет қайраткері. «Құрмет», «Парасат» ордендерінің иегері.