«Өнер – құдірет. Өнер – кие. Ал сол құдіретті туғызушыны киелі әулие демей не дерсің. Жарты әлемді темір шымылдықтың ішінде ұстаған кешегі коммунистік жүйе кезінде осы темір перденің болат құрсауын Қалтай ағамыздың құдіретті комедиялары тас-талқан етіп бұзған еді. Бұзған емей немене, киелі құдірет иесінің талантты туындылары АҚШ, Англия сияқты елдердің сахналарында қойылды. Ойындағы ойсыраған асыл сезім, арқалы сөзін өкінбестей айтып қалуға тырысты. Кешікпей-ақ көрерменін күлдіре отырып, өзегін өртер мұңға батыратын драматург Еуропа мен Американың да пердесін ашты. Сөйтіп, Қалағаңның «мұңды күлкісі» кеңес қоғамының сынауға тыйым салынған әлеуметтік-саяси проблемаларының әжуәлі астарын әлем жұртшылығына паш етті. Шындықты әріп артындағы астарлы ой мен актер қимыл-қозғалысынан тани білетін талғампаз әлем жұртшылығы Қалтайдың қас талантына талай мәрте алақан ойылғанша қол соқты. Өнердегі құдірет пен қасиет осындай-ақ болсын». Мұхтар Құл-Мұхаммед, қоғам қайраткері