Мен Нәсірді жақсы білген және оны жақсы көрген бауырларының бірімін. Қазір жер бетінде оның жоқтығына қиналатын бауырларының бірі екенімді де ешкімнен жасырмаймын. Менің бақытты жас күндерімнің досы болған осы азаматты, осы бір жақсы ағаны іштей іздеп жүргенімде рас.

            Оның творчествосымен жолыққан оқырман өзі жанының қаншама кірден тазарғанын, қаншама биіктейтінін сезінер еді. Бұл тірлігінде өз бағасын алып үлгермеген дүлдүл еді ол. Оның шығармалары жүрегіңе мейірім нұрын құяды. Жаныңды тазалап, жарқыратып, бала күніңмен жолықтырады. Оның кейіпкерлері ылғи бір мөлдір жанды кісілер. Жаны жайсаң, мейірімді, туған Сырының көктемін еске салатын жан ағамен біраз жыл дос, жолдас болғанымды мақтаныш етемін. Нәсіреддиннің достарының бәрі де менің досым.

            Тағдыр оған көп жыл бермеді. Бірақ көп бақыт, ұлы адамшылық, мейірімді талант сыйлапты.

Тұманбай Молдағалиев

Нәсіреддин Сералиев творчествосына қайта оралсаң, ол мейілінше қарапайымдылығымен ұтады. Бұлай дейтін себебіміз, қарапайымдылық – үлкен қасиет. Көпшілік осыны ұнатады.

Тәкен Әлімқұлов

Нәсір сюжетті шебер құрады, тілі бейнелі, бала мінезін жақсы біледі және олардың ішкі дүниесін нәзік суреттейді.

Асқар Тоқмағамбетов

Проза сырына қаныға келе бір шындыққа көзім жеткен: басымнан кешкен оқиғаларды, балалық, жастық шағымда көргендерімді әңгімелеп бере алсам, дегеніме жетеді екем, байқап тұрсам, біздің балалығымыз өткен шақ ұрпаққа үлгі-өнеге болар оқиғаларға бай ерекше уақыт екен.

Нәсіреддин Сералиев