Суреткер сөзі – уақыттың мәні, өзі – халықтың ұяты, өмірі – қоғамның шындығы.

            Мараттың үлкен талант екені ең алғашқы туындыларынан-ақ білінді. Мұз бұлақтан бұрқылдап атқан тау суындай тартып жібергенде шекеңнен шығатын дару сөз зәру оқырманын дәл тапты.

            Аса терең білім-білікті, шебер жазушы Марат Қабанбай кейінгі жылдары көсемсөзге көшкен. Мемлекеттікті, тәуелсіздікті қанымен, жанымен сезінген ол өзін әр деңгейдегі әлеуметтің орнына қойып байқады.

            Халықты жақтады, демократияны қолдады...

            Адамды асқақтатып, қоғамды қозғап, заманға түзету енгізгісі келетін еркіндікте іңкәр өнер иесі өзін де аямай жазалайды. Марат Қабанбай дәл осындай тұлға еді.

            Әрбір жазушы әдебиеттен алатын орнына өзі қол қойып кетеді.

Күләш Ахметова

            Мараттың шығармашылық психологиясы мен көркемдік әлемі қазақ сөз өнерінде мүлдем Құбылаға бағыт алған ішкі рухани күшпен көзқарас тұрғысында қалыптасты. Ол көсемсөздің өзін де дәстүрлі қалыпта жаза алмайтын. Қашан да мынау дүниеге көзінің сұғын өзінің кішкентай Титиі секілді белгісіз бұрыштан ерекше әсермен қарайтын. Тоқыраудың тұсында да Мараттың талантын тот басқан жоқ, керісінше, өзін-өзі үнемі қайрап, жанып, дүниежүзілік әдеби қауымның назарын аударды. Сырт жанға морт, күйректеу көрінгенімен, өзегі иілмейтін болат сым секілді берік, қиыншылыққа қарсы қасарыса білетін, ал қуанышқа егіліп кететін жұмсақ та нәзік жан еді. Соңғы сәулесі үзілгенше өмірді сүюі және өлімнің бетіне тура қарап кетуі соған дәлел.

Тұрсын Жұртбай