Адам! Ол қандай мамандық иесі болса да өзінше болмыс-бітімі, тіршілік, тағдыры бар жан. Бұл жинақтағы очерктер кейіпкерлері де талай замандарды бастан кешкен, халқымыз басынан өткерген талай хикметтерге қатысы бар адамдар. Солар арқылы кейбір жайларды біліп — қызықсаңыз, екінші бір тұстарда терең ойға қалуыңыз мүмкін.

Маңғыстау байлығын игеруге кезінде басқа республикалардан келген мыңдаған адамдардың атсалысқанын білесіздер. Солардың бірі Ленинград блокадасынан аман қалып, Маңғыстау мұнайын игеруге кіріскен шағында қапыда мерт болған Николай Лопатин еді. Ол жөніндегі баллада жанр өзгешелігімен де, оқиға желісімен де сізге ұнауы бек мүмкін. Сондай-ақ, бірқатар шығармалардың орыс тілінде беріліп отырғанын да естеріңізге саламыз. Орыс тілді оқырман көңілін аулауды да жөн көрдік.

Иә, Маңғыстау қияндағы өлке. Ең қызығы да, қызығарлығы да осынау қиян өлке қырандарының да ерекше биікке самғап ұша алатындығында сияқты. Олар көп. Сіз бұл жинақтан солардың кейбіреулері турасында ғана мағлұмат ала аласыз. Бірақ соның өзі-ақ сізді көп жайлардан хабардар етеді деп сенеміз.

Гүлжауһар Сейітжан