Наум Шафер – танымал музыка зерттеушісі, коллекционер, композитор, ғалым. Ол 25 мыңнан аса күйтабақты жинап, сақтаушы, Қазақстанның мәдени-рухани өміріне үлкен үлес қосқан тұлға. Наум Шафердің Музей-үйіндегі күйтабақтарда өзге жерлерде табыла бермейтін сирек музыкалық жазбалар кездеседі. Музыкатанушы жалпы саны 25 мыңнан аса граммофон және патефон пластинкаларын жинаған. Оның күйтабақтарды жинауға деген қызығушылығы бала кезінен басталған. Екінші дүниежүзілік соғыс жылдарында кеңес әскерлері Бессарабияны жаудан азат етіп, жергілікті тұрғындарын жан-жаққа депортациялайды. Наум Шафер ата-анасымен Қазақстанға қоныс аударылады. Көшіп-қонып жатқанда әскерилер үйдегі күйтабақтарды тастап кетуді бұйырады. Бірақ бала Наум оларды ешкімге бермей, өзімен бірге алып жүреді. Н.Шафер композитор Евгений Брусиловскийді ұстаз тұтады. Танымал тұлғамен танысуына көрнекті жазушы Ғабит Мүсірепов себепші болған екен. Кейіннен Шафер Брусиловскийдің ақыл-кеңесімен 1930 жылдардағы қазақ музыкасының жауһарларын іздеп, ауыл-аймақ, елді-мекендерді аралайды. Көп ізденістің соңы – 1936 жылы Мәскеуде жазылған күйтабақты табады. Бұл күйтабақ әзірге Қазақстандағы ең алғашқылардың бірі болып саналады. Оның бір  жағына «Кеңес» күйі, екінші жағына Құрманғазының «Балбырауын» күйі жазылған. Оны атақты қобызшы Жаппас Қаламбаев пен әйгілі күйші Лұқман Мұхитов бірлесе орындаған. Бұл күйлерді Н.Шафердің дәл осы жинағынан тыңдай аласыздар. Бұл күйлерден бөлек, қазақ әндерінің сирек кездесетін жазбаларының арасында қазақтың күміс көмей әншілері Күләш Байсейітова, Роза Бағланова, Жамал Омарова, Бибігүл Төлегенованың алғаш шырқаған әндері бар.