Сүйіктім менің, Электра

Венгриялық жазушы-драматург Ласло Дюрконың Электра туралы ежелгі мифке құрылған шығармасын қазақшаға Әбіш Кекілбаев аударған. «Айналадағы жұрттың бәрі ақымақ та, дені дұрыс жалғыз адам сенсің!» деген кекесінге толы сөздің Электраға қарата айтылуы тегіннен-тегін емес. Жұрттың бәрі Эгистке жағынып жатқанда жалғыз өзі бас көтеріп, қанішерге қарқая қарсы тұрған адамды ақымақ демей, кім дерсің? «Жалғыз жүріп періште болғаннан көппен бірге пері болған дұрыс» дегенді Электраға әпкесі ғана емес, бүкіл ел айтатындай. Бірақ, еркіндікті ештеңеге айырбастағысы жоқ Электра айтқанынан қайтпайды. Өйткені ол ақиқаттың жолына ештеңе тосқауыл бола алмайтынын біледі.