«Жүрек жазбалары» – Қазақстанның Құрметтi журналисi, Қазақстан Журналистер одағы сыйлығының лауреаты, белгiлi қаламгер Итен Қарымсақұлының үшiншi кiтабы.

Бұл – автордың бұған дейiн жарық көрген «Қоңыр қалам», «Адамдар. Жылдар. Тағдырлар» атты кiтаптарының жалғасы. «Жүрек жазбалары» – жақсының өмiрi. Қазақта «көп жасағаннан емес, көп көргеннен сұра» деген аталы сөз бар. Ұлттық журналистикада жарты ғасырдан астам уақыт тер төгiп келе жатқан Иекең де көптi көрген, көңiлге көп ой мен сыр түйген, адамдар тағдырына батыл араласып, қиын да қызық өмiр кешiп, ғажайып кейiпкерлер өмiрiн өрнектеген азамат. Алты бөлiмнен тұратын бұл ғұмырбаяндық кiтапта да журналист өмiрiнiң тағылымды да тартымды сәттерi бекзат баяндалады. «Жүрек жазбаларының» өзге кiтаптарынан ерекшелiгi – жақсының өмiрiнен өнеге алу, журналистiк ғұмырдың ғажайып сырларына қанығу, кейiпкерлерiмен бiрге өмiр сүру, жақсы мен жайсаңның қадiрiн, бағасын бiлу, үлкенге iзет, iнiге iлтипат, адамды ардақтау, т.т.

Ең бастысы, бұл кiтап айтулы азаматтың өмiр мен өнердегi өнегелi жолынан, кiшiлiгi мен кiсiлiгiнен, бiрегей бiтiм-болмысынан сыр шертедi, тағлым түйгiзедi.