Халық ауыз әдебиетіндегі Қожанасыр туралы ертегілер қоғамдық сананың кемелдене түскен шағында пайда болған. Анекдот секілді қысқа, аса елене қоймайтын құбылысты күлкі арқылы көркем өрнектеп, маңызды қорытынды түйетін бұл ертегілер тобының мазмұны астарында уытты сатира жатыр. Негізгі кейіпкер Қожанасыр – әлеуметтік тип, сырт қарағанда, ақыл-ойы шамалы, иегінен арғыны көре алмайтын қарапайым жан секілді. Алайда терең үңілгенде, өз-өзіне бек сенімді, тапқыр да ойлы жан екенін байқалады. Өмірдегі әділетсіздікті түсіне де, сезіне де білетін, оған қарсы күресе алатын халықтық образ Қожанасыр тапқырлығы және әзіл-қалжыңымен әлеуметтік өмірде, тұрмыста кездесетін кемшіліктерді сынап, қоғамның күштілерімен күресте жеңіске жетіп отырады.