«Бабалар сөзі» – көптомдық құнды дүние. Бұл серия аясында ауыздан-ауызға тарап, бүгінгі күнге жеткен өлең-жырлар, шежіре-дастандар, эпостар мен хикаялық дастандар топтастырылған. Қытай мен Моңғолиядағы қазақ фольклорымен де осы сериядан танысуға болады. «Алпамыс батыр» жырының әртүрлі нұсқасы, жалпы Батырлар жырының нұсқалары, ғашықтық жырлар, ертегілер ғана емес, оларды жырлаушылар мен жинаушылар туралы да мәлімет берілген. Ғылыми қосымшалары бар. Мәтінде кездесетін тарихи және діни есімдерге түсініктеме жазылған. Қазақ халқының қалыптасу тарихындағы ру-тайпалар, ұлыстар мен бірлестіктер, олардың атауының пайда болуы туралы әртүрлі аңыз-әпсаналар, қазақ рулары туралы аңыздар, күй және күйшілер туралы аңыздар, Әл-Фарабидің философиялық мұрасы да осы топтамада. «Бабалар сөзі» сериясының 74-томына қазақ ертегілік эпосының классикалық үлгісі қиял-ғажайып ертегілер енді. Ертегі мәтіндері қолжазба қорларындағы түпнұсқадан алынып, ешқандай өзгеріссіз, алғаш рет халықаралық каталог бойынша жүйеленіп, ғылыми қосымшамен қамтамасыз етіліп жарияланып отыр. Жинаққа барлығы 80 ертек енді.